يا صفوق....

هذه القصيده لشاعره سعوديه اعجبتني فنقلتها لكم ارجو ان تنال اعجابكم

يا ناس ليت العمر ينباع بالسوق ==وابيع واشري حاميين الذمارا

أشري هواي وكل مطرود ملحوق==لو ضاع عمري ما حسبته خسارا

دامي رفيع الاصل مع زين منطوق==ما همّني ناسٍ كثيرة هذارا

تلّيت قلبي تل يا عالي الذوق == تلّ العقود بجيد زين العذارى

من تلّتك ما باقيٍ كود معلوق ==معلوق تلعب به يمين ويسارا

ما ترحم اللي ضامره منك محروق==اللي دموعه فوق خده تجارى

يا كنّ دمعه فوق الأوجان مدفوق==سيل السّخط لا عم زين الديارا

يا نور عيني يا بعد كل معشوق == رميتني ما بين جنه ونارا

نوب تجي يمّي على طارف الشوق==واشوف بعيونك فروحي تبارا

ونوبٍ تزوّد ما بقلبي من فتوق == والقى حبالي دون وصلك قصارا

واظن ماني من ترجّيك معتوق == ليما علي أُمي تهل العبارا

واللي نصحني عن مودتك مطفوق==لو كان من ربعي قريبٍ وجارا

وشلون أبَسْلا راعي الجود يا صفوق==لو هو بعيد الدار صعب المزارا

نسل القروم مزبّنة كل مملوق == اليا عليه الوقت ميّل وجارا

انا رجيته رجوة البدو لبروق==من عقب خمسٍ بالمحل والثبارا

يرجون عقب الوسم رتعٍ ورقروق==وفي رجوته يشقون قب المهارا

وان ما حصل بالحب لي حظ ووفوق==وفازن بخلي لابسات الخمارا

لا نوح نوح الوِرق والثّوب مشقوق==وابكي حبيبي بالخفا والجهارا

وارقى طويل الرّجم واون واسوق==حتى على حالي تحن الحجارا

وأبدع من القيفان فنٍ وطاروق ==يعجِز من الشعّار وافي الشبارا

يا ناس ما بالحب تسهيل ورفوق==وهنّيت حيٍ عن بلاه استخارا

والحب ثنتين على كل مخلوق == أما سعاده أو عذاب وعزارا

صح لسانك ولا هنت يا الغالي

قصيدة في غاية الروعه والجمال

دمت لنا مبدع

اسمع انا لك توقيع بقصيدة ويا ريت تجيب رايك

والمنقول في قسم المنقول وليس في همس اقوافي